Posted at: Dec 07, 2024
Share:
ମୟୂରଭଞ୍ଜର ଦୀର୍ଘବର୍ଷର ରେଳ ସ୍ବପ୍ନ , ୩ ନୂଆ ରେଳ ପ୍ରକଳ୍ପର ଶିଳାନ୍ୟାସ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ
ମୟୂରଭଞ୍ଜ: ଗୃହଜିଲ୍ଲା ମୟୂରଭଞ୍ଜର ଦୀର୍ଘବର୍ଷର ସ୍ବପ୍ନ ପୂରଣ କରିଛନ୍ତି ରାଷ୍ଟ୍ରପତି । ଜନ୍ମମାଟି ରାଇରଙ୍ଗପୁର ଗସ୍ତର ଶେଷ ଦିନରେ ଆଜି ରାଷ୍ଟ୍ରପତି ଦ୍ରୌପଦୀ ମୁର୍ମୁ ତିନୋଟି ରେଳ ପ୍ରକଳ୍ପର ଶିଳାନ୍ୟାସ କରିଛନ୍ତି । ସେଗୁଡିକ ହେଲା ବାଙ୍ଗିରିପୋଷି-ଗୋରୁମହିଷାଣି, ବୁଡାମରା-ଚାକୁଳିଆ ଓ ବାଦାମପାହାଡ-କେନ୍ଦୁଝର ରେଳ ସଂଯୋଗୀକରଣ । ମୋଟ ୬,୨୯୪ କୋଟି ଟଙ୍କା ବିନିମୟରେ ଏହି ତିନି ରେଳ ପ୍ରକଳ୍ପ କାର୍ଯ୍ୟକ୍ଷମ ହେବ ।
ଏହା ସହ ରାଷ୍ଟ୍ରପତି ଉକ୍ତ କାର୍ଯ୍ୟକ୍ରମ ମଞ୍ଚରୁ ଭିଡିଓ କନଫରେନ୍ସି ମାଧ୍ୟମରେ ରାଇରଙ୍ଗପୁରରେ ଟ୍ରାଇବାଲ ରିସର୍ଚ୍ଚ ସେଣ୍ଟର, ରାଇରଙ୍ଗପୁର ଦାଣ୍ଡବୋଷ ବିମାନ ବନ୍ଦରର ଉନ୍ନତିକରଣ, ଏବଂ ଉପଖଣ୍ଡ ଚିକିତ୍ସାଳୟକୁ ସୁପର-ସ୍ପେଶାଲିଟି ହସ୍ପିଟାଲ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ବାଙ୍ଗିରିପୋଷିରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ରେଳମନ୍ତ୍ରୀ ଅଶ୍ବିନୀ ବୈଷ୍ଣବ, ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଓ ରାଜ୍ୟ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ମଧ୍ୟ ଉପସ୍ଥିତ ଥିଲେ ।
ପୂର୍ବାହ୍ନ ୧୦ଟାରେ ରାଇରଙ୍ଗପୁର ମହୁଲଡିହା ସ୍ଥିତ
ବୁଢ଼ାମରାରୁ ଚାକୁଲିଆ ନୂତନ ରେଳ ଲାଇନ ହେଉଛି ୬୦ କିଲୋମିଟର ଲମ୍ବ । ଏହି ଲାଇନଟି ଓଡ଼ିଶାର ମୟୂରଭଞ୍ଜ ଜିଲ୍ଲା ସହ ଝାଡ଼ଖଣ୍ଡର ସିଂହଭୁମ ଜିଲ୍ଲାକୁ ସଂଯୋଗ କରିବ । ଏହି ପ୍ରକଳ୍ପରେ ଆନୁମାନିକ ୧,୬୩୯ କୋଟି ଟଙ୍କା ବ୍ୟୟ ହେବ । ଏଥି ସହିତ ଦୀର୍ଘ ଦିନରୁ ରାଇରଙ୍ଗପୁରବାସୀଙ୍କ ଦାବି ଥିବା ବାଦାମପାହାଡ଼ରୁ କେନ୍ଦୁଝର ନୂତନ ରେଳ ଲାଇନର ଦୂରତା ପ୍ରାୟ ୮୨ କିଲୋମିଟର ଥିବା ବେଳେ, ଏଥିରେ ଆନୁମାନିକ ୨,୧୦୬ କୋଟି ଟଙ୍କା ଖର୍ଚ୍ଚ ହେବ । ଏହା ମୟୂରଭଞ୍ଜ ଓ କେନ୍ଦୁଝର ଜିଲ୍ଲାକୁ ସଂଯୋଗ କରିବ । ଅନ୍ୟ ଏକ ପ୍ରକଳ୍ପ, ବାଙ୍ଗିରିପୋଷିରୁ ଗୋରୁମହିଷାଣି ନୂତନ ରେଳ ଲାଇନର ଲମ୍ବ ୮୬ କିଲୋମିଟର ରହିଛି । ଉକ୍ତ ରେଳ ଲାଇନ ପାଇଁ ଆନୁମାନିକ ୨,୫୪୯ କୋଟି ଟଙ୍କା ବ୍ୟୟ ହେବ । ଏହି ଲାଇନ ପ୍ରକଳ୍ପ ମୟୂରଭଞ୍ଜ ଜିଲ୍ଲାର ଗୋରୁମହିଷାଣୀରୁ ବାଙ୍ଗିରିପୋଷିକୁ ସଂଯୋଗ କରିବ । ଏହି ତିନୋଟି ରେଳପଥରେ ଟ୍ରେନ ଗଡିଲେ, ଏ ଅଞ୍ଚଳରବାସୀ ରେଳ ସୁବିଧା ପାଇପାରିବେ ।
ଏହି ତିନୋଟି ରେଳ ଲାଇନର ସଂଯୋଗୀକରଣ ଦ୍ବାରା ବ୍ୟବସାୟ ବଢିବା ସହ ସ୍ଥାନୀୟ ଅର୍ଥନୀତି ମଧ୍ୟ ସୁଦୃଢ ହେବ । ଏହି ରେଳ ଯୋଗାଯୋଗ ପାର୍ଶ୍ବବର୍ତ୍ତୀ ଅଞ୍ଚଳରେ ଶିଳ୍ପକ୍ଷେତ୍ରକୁ ବଳ ଯୋଗାଇବା ସହ ଏହା ଦ୍ବାରା ସ୍ଥାନୀୟ ଲୋକମାନେ ନୂତନ ନିଯୁକ୍ତି ପାଇବାର ସୁଯୋଗ ପାଇବେ । ଏହା ବ୍ୟତୀତ ପରିବହନର ଏହି ନୂତନ ଧାରା ଅଞ୍ଚଳରେ ଚିକିତ୍ସା ଓ ଶିକ୍ଷାଗତ ସୁଯୋଗକୁ ପ୍ରୋତ୍ସାହିତ କରିବାରେ ପ୍ରମୁଖ ଭୂମିକା ଗ୍ରହଣ କରିବ ।
କାର୍ଯ୍ୟକ୍ରମ ଶେଷରେ ରାଷ୍ଟ୍ରପତି ବାୟୁସେନାର ସ୍ଵତନ୍ତ୍ର ହେଲିକପ୍ଟର ଯୋଗେ କଲେଇକୁଣ୍ଡାରେ ପହଞ୍ଚିଥିଲେ । ସେଠାରୁ ବାୟୁସେନା ସ୍ବତନ୍ତ୍ର ବିମାନପରେ ନୂଆଦିଲ୍ଲୀ ଫେରିଯାଇଛନ୍ତି । ଚଳିତମାସ ତିନି ତାରିଖରେ 5 ଦିନିଆ ଓଡିଶା ଗସ୍ତରେ ଭୁବନେଶ୍ବରରେ ପହଞ୍ଚିଥିଲେ ରାଷ୍ଟ୍ରପତି । 4 ତାରିଖରେ ପୁରୀ ବ୍ଲୁ-ଫ୍ଲାଗ ବିଚରେ ଆୟୋଜିତ ନୌସେନା ଦିବସରେ ମୁଖ୍ୟ ଅତିଥି ଭାବେ ଅଂଶଗ୍ରହଣ କରିଥିଲେ । ପରେ ରାଜଧାନୀରେ ମଧ୍ୟ ଏକାଧିକ କାର୍ଯ୍ୟକ୍ରମରେ ଅଂଶଗ୍ରହଣ କରି ଗୃହଜିଲ୍ଲା ମୟୂରଭଞ୍ଜରେ ପହଞ୍ଚିଥିଲେ । ଆଜି 5 ଦିନିଆ ଗସ୍ତ ସାରି ରାଷ୍ଟ୍ରପତି ଦିଲ୍ଲୀ ପ୍ରତ୍ୟାବର୍ତ୍ତନ କରିଛନ୍ତି ।
0 Comments