ଭୁବନେଶ୍ବର: ଓଡ଼ିଶା ସରକାରଙ୍କ ୩୦ ଜଣ ବରିଷ୍ଠ ଓଏଏସ ଅଫିସର ଆଇଏଏସ ପାହ୍ୟାକୁ ପଦୋନ୍ନତି ପାଇଛନ୍ତି । ସିଲେକ୍ଟ ଲିଷ୍ଟ-୨୦୨୩ ଓ ସିଲେକ୍ଟ ଲିଷ୍ଟ-୨୦୨୪ ବର୍ଷରେ ଏହି ୩୦ ବରିଷ୍ଠ ଓଏଏସ ଅଫିସରଙ୍କୁ ଆଇଏଏସ ପାହ୍ୟାକୁ ପଦୋନ୍ନତି ମିଳିଛି । ଓଡ଼ିଶା ପ୍ରଶାସନିକ ସେବାର ଏହି ଅଫିସରଙ୍କୁ ରାଜ୍ୟ କ୍ୟାଡ଼ରରେ ଖାଲି ପଡ଼ିଥିବା ଆଇଏଏସ ପଦବୀରେ ନିଯୁକ୍ତି ମିଳିବ । ରାଜ୍ୟ ସରକାରଙ୍କ ଆବେଦନକୁ ଗ୍ରହଣ କରିବା ସହ କାର୍ମିକ ମନ୍ତ୍ରଣାଳୟ ପକ୍ଷରୁ ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ଏହି ଅଫିସରମାନେ ଓଡ଼ିଶା କ୍ୟାଡ଼ରରେ ୨୦୧୪ ଓ ୨୦୧୫ ବ୍ୟାଚର ଆଇଏଏସ ଭାବେ ପରିଗଣିତ ହେବେ ।
୨୦୨୩ ଓ ୨୦୨୪ ମସିହା ପାଇଁ ଖାଲି ପଡ଼ିଥିବା
ଦୋନ୍ନତି ଭିତ୍ତିକ ଆଇଏଏସ ପଦବୀ ପୂରଣ ହେବ । ରାଜ୍ୟ ସରକାରଙ୍କର ୩୦ ଜଣ ବରିଷ୍ଠ ଓଏଏସ ଅଫିସର ଆଇଏଏସ ପଦବୀକୁ ଉନ୍ନୀତ ହୋଇଛନ୍ତି । ଇଣ୍ଡିଆନ ଆଡମିନିଷ୍ଟ୍ରେଟିଭ ସର୍ଭିସ (କ୍ୟାଡ଼ର) ରୁଲସ - ୧୯୫୪ର ରୁଲସ-୫(୧)ର ପ୍ରାବଧାନ ଆଧାରରେ ଓଡ଼ିଶା ପ୍ରଶାସନିକ ସେବାର ଅଫିସରମାନେ ଆଇଏଏସ ପଦବୀକୁ ଉନ୍ନୀତ ହୋଇଛନ୍ତି ।
୨୦୨୩ ସିଲେକ୍ଟ ଲିଷ୍ଟ ଆଧାରରେ ୧୫ ଜଣ ଓଏଏସ ଅଫିସର ଆଇଏଏସ ପଦବୀ ଉନ୍ନୀତ ହୋଇଛନ୍ତି
ସେହିପରି ୨୦୨୪ ସିଲେକ୍ଟ ଲିଷ୍ଟରେ ୧୫ ବରିଷ୍ଠ ଓଏଏସ ଅଫିସରଙ୍କୁ ଆଇଏଏସ ପଦବୀକୁ ଉନ୍ନୀତ ହୋଇଛନ୍ତି ।
୨୦୨୩ ସିଲେକ୍ଟ ଲିଷ୍ଟରେ ସାମିଲ ଥିବା ଓଏଏସଙ୍କୁ ଓଡ଼ିଶା କ୍ୟାଡ଼ର ଆଇଏଏସ ଭାବେ ୨୦୧୪ ବ୍ୟାଚ ଓ ୨୦୨୪ ସିଲେକ୍ଟ ଲିଷ୍ଟରେ ସ୍ଥାନିତ ଓଏଏସଙ୍କୁ ଓଡ଼ିଶା କ୍ୟାଡ଼ରର ଆଇଏଏସ ଭାବେ ୨୦୧୫ ବ୍ୟାଚ ଆବଣ୍ଟନ ହେବ ।
ବିଧାନସଭାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦେଇଥିବା ସୂଚନା ଅନୁସାରେ, ରାଜ୍ୟରେ ମୋଟ ମଞ୍ଜୁରୀପ୍ରାପ୍ତ ଆଇଏଏସ ପଦବୀ ସଂଖ୍ୟା ୨୪୮ । ସେଥିରୁ ୩୩ ପ୍ରତିଶତ ପଦବୀକୁ ଓଡ଼ିଶା ପ୍ରଶାସନିକ ସେବାର ଅଧିକାରୀଙ୍କ ପାଇଁ ସଂରକ୍ଷିତ ରଖାଯାଇଛି । ବାକି ୬୭ ପ୍ରତିଶତ ପଦବୀରେ ନିଯୁକ୍ତି ୟୁପିଏସସି ମାଧ୍ୟମରେ ହୋଇଥାଏ । ଏଥିରୁ ଅଧିକାଂଶ ରାଜ୍ୟ ପ୍ରଶାସନିକ ସେବା ନିମନ୍ତେ ଉଦ୍ଦିଷ୍ଟ ରହିଛି । ରାଜ୍ୟ କ୍ୟାଡରରେ ୧୮୧ ଜଣ ଆଇଏଏସ ଅଧିକାରୀ କାର୍ଯ୍ୟରତ ଅଛନ୍ତି । ୬୭ ପଦବୀ ଖାଲି ରହିଛି । ଏହା ବ୍ୟତୀତ ୨ ଜଣ ଆଇଏଏସ ଆନ୍ତଃ ରାଜ୍ୟ ଡେପୁଟେସନରେ କାର୍ଯ୍ୟ କରୁଛନ୍ତି । ୨୨ ଜଣ ଆଇଏଏସ କେନ୍ଦ୍ରୀୟ ଡେପୁଟେସନରେ ଅଛନ୍ତି ।
ରାଜ୍ୟରେ ସମୁଦାୟ ଆଇପିଏସ ପଦବୀ ୧୯୫ ରହିଛି । ସେଥିରୁ ୬୯ ପଦବୀ ଫାଙ୍କା । ୧୦ ଜଣ ଆଇପିଏସ ୫ ବର୍ଷରୁ ଉର୍ଦ୍ଧ୍ୱ ସମୟ ଧରି କେନ୍ଦ୍ରୀୟ ଡେପୁଟେସନରେ ଅଛନ୍ତି । ସେମାନେ ହେଉଛନ୍ତି ସ୍ୱପ୍ନା ତିୱାରୀ, ସୁନିତା କକରନ, ପ୍ରତୀକ ମହାନ୍ତି, ନିଖିଲ କୁମାର କାନୋଡିଆ, ନୀତିନଜିତ ସିଂହ, ସଂଜୀବ ଆରୋରା, ଅମ୍ରିତା ଦାସ, ଅନୁପ କ୍ରିଷ୍ଣା, ସୁଧା ସିଂ । ସାଧାରଣ ନିର୍ବାଚନ ପରେ ଡିଏସ କୁଟ୍ଟେ, ଆଶିଷ କୁମାର ସିଂ କେନ୍ଦ୍ରୀୟ ଡେପୁଟେସନରେ ଯାଇଛନ୍ତି ।