ଭୁବନେଶ୍ବର: ଏପ୍ରିଲ 1ରୁ ରାଜ୍ୟରେ ଲାଗୁ ହେବ ଏହି ସବୁ ଯୋଜନା । ସ୍ବାସ୍ଥ୍ୟ, ଶିକ୍ଷା, ବ୍ୟାଙ୍କିଂ, ପେନସନ ଓ ବିମାନ ସେବାରେ ଯୋଡି ହେବ ନୂଆ ଅଧ୍ୟାୟ । ଏହି ସବୁ କ୍ଷେତ୍ରରେ ଏପ୍ରିଲ 1ରୁ ନୂଆ ଯୋଜନା ଲାଗୁ ହେବ । ଲାଭବାନ ହେବେ ଓଡିଶାବାସୀ । ଜାଣନ୍ତୁ କେଉଁ କ୍ଷେତ୍ରରେ ଲାଗୁ ହେବ କେଉଁ ଯୋଜନା ?

ଆସନ୍ତା ଏପ୍ରିଲ 1ରୁ ରାଜ୍ୟ ସରକାର ଗୋପବନ୍ଧୁ ଜନ ଆରୋଗ୍ୟ ଯୋଜନା ଓ ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଆରୋଗ୍ୟ ଯୋଜନା ଲାଗୁ କରିବେ । 3.52 କୋଟି ଲୋକଙ୍କୁ ଏହି ଯୋଜନା ଅନ୍ତର୍ଗତ ସ୍ବାସ୍ଥ୍ୟସେବା ମିଳିବାକୁ ଯୋଜନା ରଖାଯାଇଛି । ଏହ ଯୋଜନା ଅନୁସାରେ ଓଡିଶାବାସୀଙ୍କୁ ସ୍ବାସ୍ଥ୍ୟବୀମା ଯୋଗାଇ ଦିଆଯିବ । ଏହି ଯୋଜନାରେ ପାଖାପାଖି 1.03 କୋଟି ପରିବାର ଅନ୍ତର୍ଭୁକ୍ତ ହେବେ । 67.8 ଲକ୍ଷ ପରିବାର ଏବି-ପିଏମଜେୱାଇ ଓ 35.8 ଲକ୍ଷ ପରିବାର ଜିଜେୱାଇ ଦ୍ବାରା ଉପକୃତ ହେବେ । ଆଶା କରାଯାଉଛି ଯେ ଏହି ଯୋଜନା ଅନ୍ତର୍ଗତ 3.52 କୋଟିରୁ ଅଧିକ ଲୋକେ ଲାଭବାନ ହେବେ ।

ଆୟୁଷ୍ମାନ ବୟୋବନ୍ଦନା ଯୋଜନାରେ 23.12 ଲକ୍ଷ ବରିଷ୍ଠ ନାଗରିକଙ୍କୁ ସାହାଯ୍ୟ କରିବା ପାଇଁ ଏହି ଯୋଜନା ଉଦ୍ଦିଷ୍ଟ । 70 ବର୍ଷ କିମ୍ବା ତଦୁର୍ଦ୍ଧ୍ୱ ବୟସ୍କ ମାନେ ସେମାନଙ୍କ ବୟସ ଅନୁସାରେ ଆବଶ୍ୟକ କରୁଥିବା ସ୍ୱାସ୍ଥ୍ୟସେବା ସହାୟତା ପାଇବେ ।

ସରକାରୀ କର୍ମଚାରୀମାନେ ବର୍ତ୍ତମାନ ଏନପିଏସ ବଦଳରେ ୟୁନିଫାଏଡ୍ ପେନ୍ସନ୍ ସ୍କିମ୍ (ୟୁପିଏସ୍) ରେ ଲାଭ ପାଇପାରିବେ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି । ଏହି ଯୋଜନା ରାଜ୍ୟ ସରକାରଙ୍କ କର୍ମଚାରୀଙ୍କ ପାଇଁ କାର୍ଯ୍ୟକାରୀ ହେବ ଯେଉଁମାନେ NPS ସିଷ୍ଟମର ପେନସନ ଯୋଗ୍ୟତାକୁ ପୂରଣ କରୁଛନ୍ତି । NPS କର୍ମଚାରୀଙ୍କ ପାଖରେ NPS ସହିତ କିମ୍ବା UPS ବାଛିବା ପାଇଁ ବିକଳ୍ପ ରହିଛି । 1 ଏପ୍ରିଲ 2025ରୁ ୟୁପିଏସ୍ ସିଷ୍ଟମ ସାରା ରାଜ୍ୟରେ କାର୍ଯ୍ୟକ୍ଷମ ହେବ ।

ରାଜ୍ୟ ସରକାରଙ୍କ କର୍ମଚାରୀମାନେ ୟୁପିଏସରେ ଅନ୍ତର୍ଭୁକ୍ତ ହେବେ । 25 ବର୍ଷର ସର୍ବନିମ୍ନ ଯୋଗ୍ୟତା ସେବା ଅବଧି ପାଇଁ ସେବାନିବୃତ୍ତ ପୂର୍ବରୁ 12ମାସରେ ଅର୍ଜିତ ମୌଳିକ ବେତନର 50% ପେନସନ ପ୍ରଦାନ କରାଯିବ । ସର୍ବନିମ୍ନ 10 ବର୍ଷ ଏବଂ ସର୍ବାଧିକ 25 ବର୍ଷ ପର୍ଯ୍ୟନ୍ତ ସେବା ପାଇଁ ଆନୁପାତିକ ଭାବେ ପେନସନ ଉପଲବ୍ଧ ହେବ ।

ସେହିଭଳି ଦେହାନ୍ତ ହେଲେ କର୍ମଚାରୀ ପୂର୍ବରୁ ପାଇଥିବା ଦରମାର 60% ରେ ପାରିବାରିକ ପେନସନ ପ୍ରଦାନ କରାଯିବ । ସର୍ବନିମ୍ନ ଦଶ ବର୍ଷ ସେବା ଯୋଗାଇ ଥିଲେ ଅବସର ପରେ ମାସକୁ 10 ହଜାର ଟଙ୍କା ପେନସନ ମିଳିବ ।

ପିଏମ ପୋଷଣ ଯୋଜନା ଅନୁସାରେ ସରକାରୀ ସ୍କୁଲ ପିଲାଙ୍କୁ ମାଣ୍ଡିଆ ଲଡୁ ଯୋଗାଇବାକୁ ଘୋଷଣା କରିଛି ସ୍କୁଲ ଓ ଗଣଶିକ୍ଷା ବିଭାଗ । ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ପିଲାଙ୍କୁ ମିଳିବ ମାଣ୍ଡିଆ ଲଡୁ । ଆସନ୍ତା 1 ଏପ୍ରିଲ, 2025ରୁ ଏହି ଯୋଜନା ସ୍କୁଲରେ କାର୍ଯ୍ୟକାରୀ ହେବ । ସୋମବାର, ମଙ୍ଗଳବାର ଓ ଗୁରୁବାର ଦିନ ସକାଳୁଆ ସ୍କୁଲରେ ଛାତ୍ରଛାତ୍ରୀଙ୍କୁ ତିନୋଟି ଲେଖାଏଁ ଲଡୁ ପ୍ରଦାନ କରାଯିବ । ମାଣ୍ଡିଆ, ରାଶି, ବାଦାମ ଓ ଗୁଡରୁ ପ୍ରସ୍ତୁତ ଏହି ଲଡୁ ଉଭୟ ସରକାରୀ ଓ ଅନୁଦାନପ୍ରାପ୍ତ ସରକାରୀ ସ୍କୁଲରେ ପ୍ରଦାନ କରାଯିବ । ଏହି ଲଡୁର ଦାମ ଗୋଟାକୁ 3 ଟଙ୍କା 50 ପଇସା ମୂଲ୍ୟରେ ଧାର୍ଯ୍ୟ କରାଯାଇଛି । ଏହି ପୁଷ୍ଟିକର ଲଡୁରେ ଭରପୁର ଏନର୍ଜି,ଫାଇବର, ଆଇରନ ଓ ଗୁଡ୍‌ ଫ୍ୟାଟ୍‌ ରହିଛି ।

ଆସନ୍ତା ଏପ୍ରିଲ 1ରୁ 2025-26 ଶିକ୍ଷାବର୍ଷରେ ଜାତୀୟ ଶିକ୍ଷା ନୀତି (NEP) 2020 ଲାଗୁ ହେବ ବୋଲି ସୂଚନା ଦେଇଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ । ସେହିପରି ଏପ୍ରିଲ 2ରେ ସମସ୍ତ ସ୍କୁଲ ପ୍ରବେଶ ଉତ୍ସବ ଓ ଖଡିଛୁଆଁ କାର୍ଯ୍ୟକ୍ରମକୁ ଉତ୍ସବ ଭାବେ ପାଳନ କରିବେ । ପ୍ରଥମ କରି ଶିଶୁ ବାଟିକା ଓ ପ୍ରଥମ ଶ୍ରେଣୀରେ ନାମ ଲେଖାଇଥିବା ଛାତ୍ରଛାତ୍ରୀଙ୍କ ପାଇଁ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ । ଏପ୍ରିଲ 5 ଯାଏଁ ପ୍ରବେଶ ଉତ୍ସବ ଓ ଖଡିଛୁଆଁ କାର୍ଯ୍ୟକ୍ରମ ଚାଲିବ । ଗତ ମାର୍ଚ୍ଚ 17 ରୁ 19 ମଧ୍ୟରେ ନାମ ଲେଖାଇଥିବା ଛାତ୍ରଛାତ୍ରୀଙ୍କ ପରିବାରକୁ ନିମନ୍ତ୍ରଣ ପତ୍ର ଦେଇ ଏହି କାର୍ଯ୍ୟକ୍ରମରେ ସାମିଲ ହେବାକୁ ଅଭିଭାବକଙ୍କୁ ଜଣାଇବେ ମୁଖ୍ୟମନ୍ତ୍ରୀ ।

ଓଡିଶା ଭଳି କେନ୍ଦ୍ରରେ ବି ଲାଗୁ ହେବ ଏହି ସବୁ ଯୋଜନା । ନୂଆ ଆର୍ଥିକ ବର୍ଷରେ ସରକାର ଟ୍ୟାକ୍ସକୁ ନେଇ ବଡ ପରିବର୍ତ୍ତନ କରିଥିଲେ ଯାହାକି ଏପ୍ରିଲ 1ରୁ ଲାଗୁହେବ ।ଏହି ପରିବର୍ତ୍ତନ ବରିଷ୍ଠ ନାଗରିକ, ନିବେଶକ, ବୀମା ଏଜେଣ୍ଟ, ପେନସନଧାରୀ ଓ ଅନଲାଇନ ଗେମିଂରୁ ରୋଜଗାର କରଥିବା ବ୍ୟକ୍ତିଙ୍କ ପାଇଁ ଖାସ ସାବ୍ୟସ୍ତ ହେବ ।

ଆସନ୍ତା ଏପ୍ରଲ 1ରୁ ନୂଆ ବ୍ୟାକିଂ ନିୟମ ଲାଗୁ କରିବାକୁ ଘୋଷଣା କରିଛି ଆରବିଆଇ । ଏହାର ସିଧାସଳଖ ପ୍ରଭାବ ଉଭୟ ସରକାରୀ ଓ ବେସରକାରୀ ବ୍ୟାଙ୍କ ଉପରେ ପଡିବ । ଏସବିଆଇ, ପିଏନବି, କାନାଡା ଓ ଏଚଡିଏଫସି ବ୍ୟାଙ୍କ ସେଭିଂ ଆକାଉଣ୍ଟରେ ସର୍ବନିମ୍ନ ବାଲାନ୍ସ ବୃଦ୍ଧି କରିପାରନ୍ତି । ଯଦି ଆକାଉଣ୍ଟଧାରୀ ନିଜ ଆକାଉଣ୍ଟରେ ବ୍ୟାଙ୍କ ନିୟମାନୁସାରେ ସର୍ବନିମ୍ନ ବାଲାନ୍ସ ରଖନ୍ତି ନାହିଁ ତେବେ ତାଙ୍କୁ ଜୋରିମାନା ଦେବାକୁ ପଡିବ ।

ଏପ୍ରିଲ 1ରୁ ଆୟକରରେ ବଡ ପରିବର୍ତ୍ତନ ଦେଖିବାକୁ ମିଳିବ । ଫେବୃଆରୀ 1ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଉପସ୍ଥାପନା କରିଥିବା ବଜେଟରେ 12 ଲକ୍ଷ ପର୍ଯ୍ୟନ୍ତ ଆୟକର ମୁକ୍ତ ପାଇଁ ଘୋଷଣା କରିଥିଲେ । ଏହା ଠୁ ଅଧିକ ଦରମା ଥିଲେ ଆୟକର ଦେବାକୁ ପଡିବ । ପୂର୍ବରୁ ନୂଆ ଆୟକର ସିଷ୍ଟମରେ 12 ଲକ୍ଷ ଆୟ ଥିଲେ 80 ହଜାର ଟଙ୍କା ପର୍ଯ୍ଯନ୍ତ କର ଦେବାକୁ ବ୍ୟବସ୍ଥା ରହିଥିଲା ।

କ୍ଷୁଦ୍ର ସଞ୍ଚୟ ଯୋଜନାରେ ବଦଳିବ ସୁଧ ହାର । ଏପ୍ରିଲ 1ରୁ ପୋଷ୍ଟ ଅଫିସରେ ଥିବା ସମସ୍ତ ଯୋଜନାରେ ସୁଧହାରରେ ପରିବର୍ତ୍ତନ କରାଯିବ । ପୋଷ୍ଟ ଅଫିସରେ ସୁଧହାର ତ୍ରୈମାସିକ ଅନୁସାରେ ପରିବର୍ତ୍ତନ ହେବ । ସୁଧହାରର ପ୍ରଭାବ ପୋଷ୍ଟ ଅଫିସ ଟାଇମ ଡିପୋଜିଟ ସ୍କିମ, ଡାକଘର ଆବର୍ତ୍ତୀ ଜମା ଯୋଜନା (ଆରଡି),ବରିଷ୍ଠ ନାଗରିକ ସଞ୍ଚୟ ଯୋଜନା (ଏସସିଏସଏସ), ଜାତୀୟ ସଞ୍ଚୟ ସାର୍ଟିଫିକେଟ (ଏନଏସସି), ଲୋକ ଭବିଷ୍ୟନିଧି ଯୋଜନା (ପିପିଏଫ),କୃଷି ବିକାଶ ପତ୍ର,ମହିଳା ସମ୍ମାନ ସଞ୍ଚୟ ସାର୍ଟିଫିକେଟ, ସୁକନ୍ୟା ସମୃଦ୍ଧି ଯୋଜନା ସମେତ ଅନ୍ୟାନ୍ୟ ଯୋଜନାରେ ନିବେଶରେ ପ୍ରଭାବ ପଡିବ ।

ଅତ୍ୟାବଶ୍ୟକ ଔଷଧ ପେନ୍‌କିଲର୍‌, ଆଣ୍ଟିବାୟୋଟିକ୍ସ, ଆଣ୍ଟିଇଫେକ୍ଟିଭ, ଆଣ୍ଟିଡାଏବେଟିସ ଓ କ୍ୟାନସର ଔଷଧ ଦରରେ ଏପ୍ରିଲ 1ରୁ ସାମାନ୍ୟ ବୃଦ୍ଧି ହେବ ।ହୋଲସେଲ ପ୍ରାଇସ ଇନଡେକ୍ସ (WPI) ଅନୁସାରେ ସରକାର (ଏନଏଲଇଏମ)ରେ ସାମିଲ ଔଷଧଙ୍କ ପାଇଁ 1.74 ପ୍ରତିଶତ ମୂଲ୍ୟବୃଦ୍ଧି କରିଛନ୍ତି ।