କେନ୍ଦୁଝର - ଗନ୍ଧମାର୍ଦ୍ଦନ ଲୋଡିଂ ଏଜେନ୍ସିରେ ହୋଇଥିବା ଅନିୟମିତତାରେ ବିଜେଡ଼ି ନେତା ସୌମ୍ୟ ଶଙ୍କର ଚକ୍ର ଗିରଫ ହେବା ପରେ ଇଓଡବ୍ଲ୍ୟୁ ତଦନ୍ତକୁ ବାଟବଣା କରିବାକୁ ରାଜା ଚକ୍ରଙ୍କ ପକ୍ଷରୁ ଉଦ୍ୟମ କରାଯାଉଛି| ଯେଉଁଥିପାଇଁ ଓକିଲଙ୍କ ଜରିଆରେ ଏଣୁ,ତଣୁ ମିଥ୍ୟା କାହାଣୀ କହି ସାଧାରଣ ଲୋକଙ୍କୁ ଏବଂ ତଦନ୍ତକାରୀ ସଂସ୍ଥାକୁ ଭ୍ରମିତ କରାଯାଉଛି ବୋଲି ବିଜେପି ନେତା ଅଞ୍ଜନ କୁମାର ବେଜ୍ ଆଜି ଏକ ପ୍ରେସ ବିଜ୍ଞପ୍ତିରେ ଜଣାଇଛନ୍ତି।
ସେ କହିଛନ୍ତି, ୨୦୧୭ରୁ ୨୦୨୦ ମସିହା ପର୍ଯ୍ୟନ୍ତ ମୁଁ ଗନ୍ଧମାର୍ଦ୍ଦନ ଲୋଡିଂ ଏଜେନ୍ସିର ସଂପାଦକ ଦାୟିତ୍ବ ତୁଲାଉଥିଲା । କିନ୍ତୁ ପରବର୍ତ୍ତି ସମୟରେ ଅନ୍ୟମାନେ ଦାୟିତ୍ବ ନେଲେ । ଯଦିଓ ଅନ୍ୟମାନଙ୍କ ହାତରେ ଦାୟିତ୍ବ ଥିଲା, ବାସ୍ତବ କ୍ଷମତା କିନ୍ତୁ ଉପଭୋଗ କରୁଥିଲେ ବିଜେଡ଼ି ନେତା ରାଜା ଚକ୍ର। ଏକଥା ମୁଁ ନୁହେଁ, ଖୋଦ୍ ତଦନ୍ତକାରୀ ସଂସ୍ଥା ଇଓଡବ୍ଲ୍ୟୁ ମଧ୍ୟ ଆଗରୁ ଏକଥା ଗଣମାଧ୍ୟମକୁ ଜଣାଇଛି।
ଖାଲି ସେତିକି ନୁହଁ, ସେଠାରେ କିଭଳି ଓ କେମିତି ରିଜ୍ୟୋଲିସନ କରାଯାଏ, ତାହା ପ୍ରାୟ ସମସ୍ତେ ଜାଣିଛନ୍ତି | ମିଥ୍ୟା ଦସ୍ତଖତରେ ସମସ୍ତ ରିଜ୍ୟୋଲିସନ ପାସ୍ ହୋଇଥାଏ । ଏକଥା ଗଣମାଧ୍ୟମ ଚାହିଁଲେ ବି ଏଜେନ୍ସିର ଅନ୍
କର୍ମକର୍ତ୍ତାଙ୍କ ଠାରୁ ବୁଝି ପାରିବା
ସେମିତି ଆକାଉଣ୍ଟରେ ମୋତେ ଯେଉଁ ଟଙ୍କା ଦେଇଛନ୍ତି ବୋଲି ସେମାନେ ଦାବି କରୁଛନ୍ତି, ତାହା ସଂପୂର୍ଣ୍ଣ ମିଥ୍ୟା ଏବଂ କପୋଳକଳ୍ପିତ। ଏଥିନେଇ ସେମାନେ ମୋ ନାମରେ ତଥ୍ୟ ନ ଦେଖାଇ ଲୋକଙ୍କୁ କେବଳ ଭ୍ରମିତ କରୁଛନ୍ତି। ବରଂ ଏକ୍ଷେତ୍ରରେ ସେମାନେ ମୋର ରାଜନୈତିକ ଛବି କିମ୍ବା ମୋ ଦଳର ରାଜନୈତିକ ଛବିକୁ ଖରାପ କରିବାକୁ ଏଭଳି ହୀନ ଉଦ୍ୟମ କରୁଛନ୍ତି । ପୂର୍ବରୁ ମୁଁ ନିଜେ ସୌମ୍ୟ ଶଙ୍କର ଚକ୍ରଙ୍କ ବିରୋଧରେ ଅପରହରଣ ମାମଲା କରିଥିଲି। ସେତେବେଳେ ବିଜେଡି ସରକାର ଥିଲା। କେନ୍ଦୁଝର ଟାଉନ ଥାନାରେ ଏଥିନେଇ କେସ ନମ୍ବର-୩୦୮/୨୦୨୪ରେ ମାମଲା ରୁଜୁ ହୋଇଥିଲା । କିନ୍ତୁ ତତ୍କାଳୀନ ବିଜେଡ଼ି ସରକାରଙ୍କ ଛତ୍ରଛାୟାରେ ଥିବା ରାଜା ଚକ୍ରଙ୍କୁ ହାତ ମାରିବାକୁ ସେତେବେଳେ ପୁଲିସ ସାହସ କରି ନ ଥିଲା। ଯାହାର ରାଗ ଏବେ ଶୁଝାଉଛନ୍ତି ରାଜା ଚକ୍ର ।
ତେଣୁ ଏ କ୍ଷେତ୍ରରେ ମୁଁ ରାଜା ଚକ୍ରଙ୍କୁ ଆହ୍ୱାନ କରୁଛି, ସେ ଇଓଡବ୍ଲ୍ୟୁର ତଦନ୍ତକୁ ସମ୍ମୁଖୀନ ହୋଇ ତଦନ୍ତକାରୀ ଅଧିକାରୀଙ୍କପାଖରେ ସମସ୍ତ ତଥ୍ୟ ଦାଖଲ କରନ୍ତୁ। ସତ୍ୟାସତ୍ୟ ନିଶ୍ଚିତ ପଦାକୁ ଆସିବ ବୋଲି ଅଞ୍ଜନ ବେଜ୍ ଏକ ପ୍ରେସ ବିଜ୍ଞପ୍ତିରେ ପ୍ରକାଶ କରିଛନ୍ତି।